CEBU, Philippines - Patay ang usa ka lalaki human gipusil sa wala mailhing tawong nagsakay og motorsiklo diha sa Sitio Cambangyao, Barangay Poblacion sa lungsod sa Dalaguete. Ang biktima naila nga si Alberto Tagalog, 31, molupyo sa nahisgotan nga dapit ug naglakaw pauli sa ila dihang gipusil sa lalaking nagmotor.
Naabtan pa sa kapolisan ang biktima nga napuno sa samad pinusilan nga nagligdas na sa karsada ug gidala kini ngadto sa Julio Cardinal Rosales Memorial Hospital apan gideklarar kini nga dead on arrival.
Narekober sa kapolisan didto sa crime scene ang usa ka kabhang sa bala sa wala pa matino nga armas ug gipadala na sa Regional Crime Laboratory 7 alang sa ballistics examination.
Nasuta sa imbestigasyon sa kapolisan nga ang live-in partner sa biktima nga si Jenny Vergara, napalgan ‘sab nga patay sa Barangay Consolacion, Dalaguete niadtong Septiyembre 16, 2014.
Nagtuo ang kapolisan nga personal nga bangi ang hinungdan sa maong pagpatay ug gitan-aw usab ang posibilidad nga konektado ang pagpatay sa duha. (BANAT NEWS)