Bana, “kabit” gipadakop sa misis

CEBU, Philippines - Gipadakop sa asawa ang iyang bana kauban sa babaye nga gialegar nga iyang “kabit” diha sa ilang balay sa Sitio Lamac, Barangay Tayud, Lungsod sa Liloan.

Ang gidakop mao ang 32 anyos nga bana (pangan gitago sa Banat News) ug ang kabit niini nga 27-anyos nga dalaga apan adunay tulo ka mga anak.

Matud pa ni Senior Police Officer One Bryan Batiquen nga ang asawa sa lalaki midangop kanila ug misumbong nga nakigdulog og babaye sa sulod sa lawak sa ilang panimalay ang iyang bana.

Ang asawa gikan pa sa trabaho isip production worker sa usa sa mga establisamento sa Mactan Export Processing Zone (MEPZ) sa Dakbayan sa Lapu-Lapu ug nahingangha pag-uli nga may laing babaye sa ilang panimalay sa pagpauli niini.

Apan ang bana nga nahinabi sa Banat News sa telepono mihimakak nga nagdulog sila sa babaye sa sulod sa lawak dihang gidakop sila sa mga polis.

Matud niya nangaon lang sila kauban sa duha nila ka mga anak ug nakurat na lang siya pag-abot sa asawa ug mga polis.

Midugang kini nga nakigbulag na kaniya ang iyang asawa ug miuli kini sa iyang mga ginikanan dala pa ang ilang mga anak. (BANAT NEWS)