CEBU, Philippines - Duha ka tawo ang naghikog patay sa probinsiya sa Sugbo sa niaging adlaw.
Patay na nga nakit-an sa iyang igsuon ang 30-anyos nga lalaki human naghikog gamit ang pisi sulod sa ilang panimalay sa sitio Kawasan, Montpeller, Alegria niadtong nakalabay nga gabii.
Ang nagpakamatay naila nga si Alfredo Glinogo, ulitawo. Matud ni PO1 Julemark Yap nga pasado alas 2 sa hapon nakig- inom pa si Glinogo sa iyang mga ig-agaw ug niuli kini sa balay pasado alas 6 na sa gabii.
Sa wala pa nilakaw sumala pa nga nagbilin kini og estorya sa iyang mga ig-agaw nga nagkanayon, “gaw og mamatay ko kabalo na ka asa ko padulong,” apan wala lang gitagad sa ilang mga kauban. Pasado alas 10 sa gabii dihang nauli sa ilang balay ang laing igsuon nga si Alberto, natingala kini nga wala’y suga ug ngitngit ang ilang balay.
Sa iyang pagsulod sa balay iya na lang nakita nga nagbitay na sa pisi si Alfredo ug wala na’y kinabuhi.
Ang inahan nga si Teresita miingon nga dunay gibati nga kasuko ang iyang anak sa ilang pamilya sa wala pa matino nga hinungdan.Samtang sa lungsod sa Compostela, patay na sab nga nadiskobrehan sa iyang asawa ang iyang bana nga nagbitay sa punoan sa kahoy sa gawas sa ilang balay sa barangay Dapdap.
Ang nagpakamatay naila nga si Antonio Avila, 54-anyos. Sigun sa asawa nga si Jovita nga sa wala pa nagpakamatay ang iyang bana iya kini’ng nabantayan nga daw sa dili mahimutang. (BANAT NEWS)