CEBU, Philippines - Gibalhug sa bilanggoan sa Balamban Police Station ang 45-anyos nga bana kinsa hubog nga niuli sa iyang balay ug nangulata sa iyang asawa.
Si Ike Jose Caballero giingong nasuko nga wala tagai og kuwarta sa iyang asawa nga iya unta ipanugal sa sitio Menteryong Daan, Pondol, lungsod sa Balamban niadtong nakalabay nga gabii.
Si Evangeline, 48, nagpakitabang sa kapolisan human sa insidente.
Matud ni PO2 Alfredo De Gracia sa Balamban Police nga human nakatawag ang asawa sa ilang buhatan aron magpatabang dali sab nila nga girespondehan ang lugar. Naabtan pa sa kapolisan nga gihawiran sa abaga sa bana ang iyang asawa.
Sigun pa sa asawa nga gisiko sa iyang bana ang iyang dughan ug gibira pa ang iyang buhok dihang wala siya mohatag og kuwarta.
Gustong mobalik ang suspek sa derby human kini napilde.
Sumala pa ni De Gracia nga human nahuwasan si Caballero, labihan ang pagmahay nga iyang gipasakitan ang asawa hinungdan nga siya nabalhug sa prisohan. “Sa iyang balay daw sir foam ang iyang higdaan unya diri matulog ra daw siya sa semento, pwerteng mahay gyud hinuon niya,” sigun pa ni De Gracia.
Apan gipasabot ni De Gracia nga hayan ila ra sab nga pagawson sa bilanggoan si Caballero human nga wala na sab mobalik sa ilang buhatan ang asawa. (BANAT NEWS)