Nagtakos og shabu gipatay

CEBU, Philippines - Tawo nga nakaeskapo sa pagpangronda sa kapolisan batok sa drugas wala makaikyas diha nga girapido siya’g mga bala sa usa ka gunman sulod sa iyang payag-payag sa Barangay Pulangbato nga matud pa nagtakos pa og drugas.

Ang namatay didto sa Sitio Aroma, Pulangbato kagahapon sa buntag mao si Randel Miñoza. Samdan usab ang iyang kauban nga si Robert Ledesma kang kansang kauban nakaikyas.

Si PO1 John Erick Samosa sa homicide section sa Cebu City Police Office (CCPO) mibutyag nga tulo ka lalaki nga nagsakay og motorsiklo ang kalit lang mihunong tungod sa payag sa biktima ug ang angkas mao’y nanaog ug mipusil dayon ni Miñoza.

Sagad sa igo sa biktima diha g’yud sa nawong ug duna sa’y tama sa buko-buko hinungdan sa iyang kamatayon. Ang samaron nga si Ledesma dali nga gidala sa North General Hospital, apan sa dihang paingon na unta kini nga ipa X-ray kalit lang kini midagan ug misibat sa hospital. Matud sa nurse nga si Ledesma may pinusilan sa iyang tiyan ug ang bala milapos sa buko-buko.

Nagtuo si Samosa nga posible’ng nahadlok si Ledesma nga ipadakop sa mga polis kay ang nahitaboan sa pagpamusil maisip man nga usa ka drug den.

Nakuha sa crime scene ang 10 ka basiyo sa 9mm nga bala, usa ka tapok sa drugas nga paingon pa i-repack ug daghang tin foil.

Ang napatay nga si Miñoza mao ang target sa mga sakop sa Philippine Drug Enforcement Agency (PDEA-7) sa usa ka drug raid pipila ka buwan ang nakalabay apan nakaikyas human misukol og pinusilay diin napatay gani ang kauban ni Miñoza.

Sa Sibonga, usa ka taxi driver ang gipusil patay sa duha ka wala mailhi’ng lalaki nga nagsakay og motorsiklo didto sa Barangay Candaguit, kaniadtong Martes sa kaadlawon.

Ang gipatay mao si Christopher John Espinosa, 39, minyo, taga Barangay Bulasa, Argao. Nagsakay ang biktima sa iyang motorsiklo gikan sa Carcar ug paingon unta siya sa Argao diha’ng pag-abot sa Sibonga gipusil siya sa tawo nga nagback-ride sa motor nga nagsunod kaniya.

Duha ka samad sa ulo ug usa sa tiyan ang naangkon ni Espinosa ug maoy nakapatay kaniya. Tulo ka kabhang sa bala ang nakuha sa dapit nga nahitabon sa pagpamusil.

Si PO2 Ederlino Bacusmo, imbestigador sa Sibonga Police Station, nagkanayon nga gituohang nihunong sa Carcar ang biktima aron mupalit og marijuana apan nakakita hinuon kini og engkwentro ug sekreto nga gisundan. (BANAT NEWS)