Clamping Ordinance Legal–SC

CEBU, Philippines – Ang Korte Suprema mihukom nga legal ang ordinansa sa dakbayan nga naghatag og katungod sa mga traffic enforcers pag-clamp sa mga sakyanan nga masakpan nga ipataka lang pag-parking daplin sa karsada nga makabalda sa pag-agi sa ubang sakyanan ug sa mga tawo.

Ang tanang sakop sa Korte Suprema nga gipangulohan ni Chief Justice Maria Lourdes Sereno mitataw nga katungod sa usa ka local government unit (LGU) sama sa dakbayan sa Sugbo ang pagmentinar sa kahapsay sa trapiko sa ilang teritoryo.

Gibasura sa Korte Suprema ang gipasaka nga buwag nga mga Petition for Review on Certiorari ni kanhi assemblyman Valentino Legaspi ug susama nga petisyon nila ni Bienvenido Jaban Sr. ug anak nga si Bienvenido Douglas Luke Bradbury Jaban.

Matud sa mga justices sa labing taas nga hukmanan nga ang mga mipasaka og petisyon wala makapakita og lig-on nga basihanan aron baliktaron sa Korte Suprema ang hukom sa Court of Appeals.

Ang mga sakyanan nila ni Legaspi ug sa amahan ug anak nga bansagon og Jaban, pareho’ng na-clamp sa mga sakop sa CITOM tungod kay nasakpan nga giparada sa daplin sa karsada.

Ang kotse ni Jaban giparking daplin sa dalan Manalili kaniadto’ng Hunyo 23, 1997 ug sa ilang pagbalik gi-clamp na sa mga traffic enforcers ug gitangtangan lang sa clamp diha nga gibayran nila ang P4,200 nga traffic violations.

Pagka Nobiyembre 20, 1997, ang sama nga sakyanan ni Jaban na-clamp na ‘sab sa mga sakop sa CITOM samtang gi-parking didto sa Taboan Public Market ug nakabayad na usab sila’g multa.

Samtang ang kotse nga puti ni Legaspi nasakpan usab nga giparking daplin sa karsada duol sa iyang balay kaniadto’ng Hulyo 29, 1997.

Sila si Legaspi ug Jaban mipasaka og kaso batok sa CITOM ug sa kagamhanan sa dakbayan sa Sugbo. Ang Regional Trial Court (RTC) mihukom nga nakalapas sa balaud ang ordinansa sa dakbayan.

Ang mga abogado sa dakbayan mikwestyon sa hukom sa RTC didto sa Court of Appeals. Ang Appellate Court mibaliktad sa hukom sa RTC ug miingon nga nasubay sa balaud ang ordinansa sa dakbayan.

Kini maoy nakatukmod nila ni Legaspi ug Jaban nga modangop sa Korte Suprema apan napilde sila sa ilang kaso. (BANAT NEWS)