Martilyo gang

CEBU, Philippines – Mga gidudahang miyembro sa “Martilyo Gang” mitulis sa Palawan Pawnshop ug gisakiyo ang gibanabanang P500 mil nga balor sa mga alahas sa glass showcase niini.

Ang insidente nahitabo kagahapon diha sa Sitio Liong, Barangay Paknaan, dakbayan sa Mandaue nga gihimo sa tulo ka armadong lalaki nga dali kaayong nakadisarma sa nag-inusarang guwardiya.

Si Senior Inspector Jimmy Portes nga maoy hepe sa presinto sa Mandaue City Police Office (MCPO) nga maoy nangulo sa pagtubag sa maong alarma miingon nga ang nagbantay sa maong establisamento mao sila si Cristy Joy Villar Cabahug, 26, nga maoy appraiser officer sa nahisgotang ahensiya ug ang guwardiya nga si Ronnie Auman Sabrido, 41. Matud pa ni Portes nga nagsakay og Kawasaki nga motorsiklo ang tulo ka tulisan ug  ang duha maoy misulod sa pawnshop samtang ang usa maoy nagsilbing lookout.

Ang usa giingong kalit mition og armas sa guwardiya ug gisakmit ang kalibre .38 niining armas samtang ang kauban mition og armas kang Cabahug ug mideklarar nga tulis.

Matud pa nga gihapak sa mga tulisan og tire wrench ang estante nga bildo  ug gihakop ang mga alahas nga gi-display ug gisulod sa gidala nga knapsack. Human niini, dali nga nanggawas sa maong pawnshop ang duha ka tulisan ug misakay kini sa nagpaabot nga motorsiklo nga  nagdala sa temporary plate number 01016 ug mipabulhot palayo sa maong dapit. Si PO1 Mar Villamonte sa kapolisan sa nahisgotang presinto nga nahinabi sa Banat News miingon nga mohimo pa sila og dugang pakisusi sa maong pagpanulis nga naglakip na niini ang pagtan-aw sa Close Circuit Television Camera (CCTV) alang sa pag-ila niini. “We can’t discount the possibility,” matud pa ni Senior Superintendent Petronelli Baldebrin sa gipadala niining text message sa Banat News kabahin sa posibilidad nga “Martilyo Gang” ang responsable sa maong pagpanulis.

Nasayran usab nga ang nakuhang mga tire wrench sa crime scene giingong napalit sa usa ka lokal nga tindahan diha gihapon sa maong siyudad.

Ang “Martilyo Gang” nanghasi kaniadto sa kaulohan ug nakatulis og ubay-ubay nga mga dagkong malls hinungdan sa paghigpit sa seguridad. Gani ang mga tulisan anha pa namalit sa ilang gamitong tools sa mga tindahan sa sud sa mall nga ilang tulison. – /EIM) (BANAT NEWS)