Sinkhole sa badian nagkadako

CEBU, Philippines - Mianam og kadako ang sinkhole nga mibutho tungatunga sa karsada sa Barangay Banhigan, lungsod sa Badian.

Ang Department of Environment and Natural Resources (DENR-7) mibutyag nga  magsige og lihok ang maong sinkhole  maong magsige kini og kadako.

Matud ni Eddie Llamedo, Public Information Officer sa DENR-7 dihang unang nadiskubrehan ang sinkhole anaa lang kini sa unom ka metros ang gilapdon apan karon miabot na og 12 ka metros ang gilapdon sa baba niini.

Tungod kay padayon man kining naglihok ug delikado sa mga residente sa maong lugar,  mipagawas ang ahensiya og “ground subsidence threat advisory” kang Badian Mayor Robert Librando nga monitoron ang lugar, i-cordon, ug ihiklin ang siyam ka panimalay nga nasulod sa 20 metros gikan sa baba sa maong sinkhole.

Gidugang ni Llamedo nga gisultihan na usab nila ang mayor sa lungsod nga pormal nga mo-request og ground penetrating radar survey  aron sutaon ang gilawmon niini ug kun duna pay ubang dapit nga posibleng magka-sinkhole.

Gipasabot sa ahensiya nga ang sinkhole mahimong motumaw  tungod sa linog ug ikaduha ang grabeng pag-uwan. (BANAT NEWS)