CEBU, Philippines - Kapin sa P90 milyones ang gibana-banang danyos sa mga imprastraktura ug agrikultura nga naguba sa bagyong Queenie base sa report sa Cebu Provincial Disaster Rick-Reduction Management Office.
Mao kini ang pasiuna nga report sa CPDRRMO kabahin sa gibilin nga kadaut ni Queenie sa mga lungsod sa Malabuyoc, Dalaguete, Alcoy, Oslob, Badian, Alegria ug Argao.
Apan bisan pa man niini, andam ang hepe sa PDRRMO nga si Baltazar Tribunalo sa dakong hagit sa rehabilitasyon.
Matud ni Tribunalo nga kun ang katawhan dili motuman sa evacuation plan walay pulos ang early warning system ug awhag niya nga mubakwit dayon bisan pa man og dili pa kusog ang uwan.
Agi'g lakang sa rehabilitasyon, plano sa PDRRMO nga mopahigayon og Climate Change Risk-Simulation aron masuta pinaagi sa hazard mapping ang gidaghanon o bul-og sa tubig nga posible’ng moresulta og pagbaha.
Sa laing bahin, giklaro ni Tribunalo nga walay kalabutan ang bagyo sa kamatayon adtong mananagat sa Oslob kay namatay kini sa wala pa mi-landfall ang bagyo.
Giingong nangisda ang maong tawo ug nawagtang human mi-ambak sa dagat. (BANAT NEWS)