CEBU, Philippines – Muabot sa napulo ka tawo ang nasikop sa mga sakop sa Provincial Intelligence Branch (PIB) sa Cebu Provincial Police Office (CPPO) ug mukabat sa P182, 900 nga kantidad sa drugas ang nasakmit sa usa ka gi-abangan nga balay sa Catarman, Liloan niadtong nakalabay nga hapon.
Sikop sa maong operasyon ang target sa kapolisan nga si Reynan Lofranco, level 3 drug pusher, ug nasikop sab ang igsuon niini nga buntis nga si Sarah May ug ang inahan nga si Warlita Lofranco.
Apil sa nadakpan ang mga manuyopay sa maong drug den nga sila si Arlen Bantilles, Erwin Bugtal, Tirso Vergara Jr., Jedan De Guzman, Jerome Abiraza, Kient Balaba ug Eugene Restauro. Gamit ang buy-bust money nga P250 dali nga ilang gisulod ang balay nga giabangan sa pamilya nga misangpot sa pagkasikop sa napulo ka tawo pasado alas 4 sa hapon.
Nakuha sa kapolisan ang tulo ka dagku nga putos sa gituohang drugas ug napulo ka gagmay nga pakete nga mitimbang sa 15.5 gramos.
Matud pa ni Sr. Insp. Leo Logroño, nangulo sa operasyon, nga mitug-an kaniya si Lofranco nga igo lang sila nag-abang sa balay nga ang tag-iya tua gawas sa nasud.
“Cebu City daw ang supply nila gikan, ato pa nang i-check,” matud ni Logroño. Gitanggong na sa Consolacion Police detention cell ang 10 ka dinakpan.
Samtang nadakpan sa kapolisan ang usa ka pusher sa buy-bust operation nga ilang gihimo sa Housing, Canduman, dakbayan sa Mandaue alas 11 pasado sa niaging Sabado sa gabii.
Si Senior Inspector Romil Lugan, hepe sa Presinto 6 sa Mandaue City Police Office (MCPO), niila sa dinakpan nga si Junreyboy Sorion, 27, nagpuyo sa maong dapit.
Nakuha ang duha ka paketeng shabu uban sa P200 nga buy-bust money ug dugang duha ka pakete dihang ilang gi-rekisa ang kalawasan sa suspek. – /GMR) (BANAT NEWS)