Training sa mga polis kanunayon
CEBU, Philippines - Angayan g’yud nga himoan kanunay og pagbansay-bansay ang kapolisan ug tudloan sila unsaon pag-handle ang mga ebidensiya nga makuha gikan sa mga dinakpan nga malapason sa balaud sa ilegal nga drugas.
Ang Cebu Provincial Anti-Drug Abuse Commission (CPADAC) padayon nga mihimo’g training sa kapolisan aron makat-on sila sa tukma nga pag-handle sa mga ebidensiya aron dili mabasura ang kaso nga ilang ipasaka.
Si Provincial Prosecutor Jane Petralba miingon nga ang rason ngano nga ang CPADAC kanunay nga mohimo’g training ngadto sa kapolisan tungod kay ang mga polis ibalhin-balhin kini og lugar nga madestinohan ug ang mapuli kasagaran wala pa kini kahibawo kabahin pag-handle sa mga ebidensiya batok sa mga suspetsado sa ginadiling drugas.
Samtang gipasabot ni Petralba nga kabahin sa pagpirma sa imbentaryo sa kapolisan sa ipahigayon’g raid sa ginadili’ng drugas, dili g’yud kinahanglan ang presensiya sa usa ka opisyal sa barangay atol sa “search.”
Matud ni Petralba ang presensiya sa opisyal sa barangay nga mopirma sa inventory gikinahanglan lang atol sa pag-imbentaryo sa mga ebidensiya.
Dunay mga opisyal sa barangay nga moreklamo nga papirmahon sila sa imbentaryo sa raid sa ginadili’ng drugas nga wala man sila atol nga gipahigayon ang pag-search.
Sa laing bahin, gibutyag ni Petralba nga kapin sa 700 ka docketed nga kaso sa drugas sa probinsiya ang na-disposed nila gikan niadto’ng buwan sa Enero. (BANAT NEWS)
- Latest
