Pagpalawom sa sapa dili sulbad sa baha

CEBU, Philippines -  Ang pangulo sa mga weather forecasters diha sa Mactan mitataw nga lahi na gayud ang uwan karong panahona kay magdala na kini og daghang tubig nga bisan sa kadiyot lang nga pagbunok makamugna dayon kini og pagbaha.

Si Engr. Oscar Tabada miingon nga dili na kasarangan ang pag-ulan kay sa pipila lang ka gutlo nga pagbundak magdala man kini og daghang tubig nga makaingon sa mga pagbaha.

Matud ni Tabada nga usa sa hinungdan sa pagbaha kay dili na makahunob ngadto sa yuta ang tubig tungod kay daghan na’ng mga dapit ang gipangsemento sa nagpadayon nga kalamboan.

Gitataw sa pangulo sa PAGASA-Mactan nga gawas sa gipangsemento nga lugar nga dili na makahunob ang tubig-ulan ngadto sa yuta, nakasinati na usab og kadaut ang atong kalikopan tungod sa padayon nga pagpamutol og kahoy ug pagdaob og mga plastic.

Dugang pa ni Tabada nga adunay pagpananom og kahoy ang kagamhanan apan dili na masiguro kun nabuhi ba kini tungod kay walay nagsunod sa pag-alima sa mga gitanom.

Alang kang Tabada dili makasulbad ang paggahin sa kagamhanan og minilyon nga salapi alang sa pagpalawom sa mga kanal o mga sapa sa pagsulbad sa baha.

Matud ni Tabada nga ang labing maayong pagahimoon mao ang pagtukod og water catchment nga maoy kapundohan sa tubig sa panahon nga kusog ang pagbunok sa ulan.  (BANAT NEWS)