CEBU, Philippines - Duha ka buwag nga kalihukan nga anha ipahigayon sa dakbayan sa Mandaue karong adlawa gipaabot nga makamugna og grabe’ng problema sa dagan sa mga sakyanan.
Ang kapolisan ug ang mga sakop sa lainlaing relihiyoso nga kahugpongan maoy magpahigayon og buwag nga kalihukan karong buntag ingon man sa hapon.
Sayo karong buntag, ang halos tanan nga mga polis nga nadistino sa Mandaue mopahigayon og Zumba anha sa parking area sa Park Mall, ug dayon isunod nila ang pagpahigayon og Fun Run subay sa lainlaing mga karsada sa dakbayan.
Si Arnold Malig-on sa Mandaue City Police Office (MCPO) Command Center nagkanayon nga ang kalihukan sa kapolisan karong buntaga nagdala sa ulohan nga Swords of Fire Heroes 2014.
Mga sakop sa Traffic Enforcement Agency of Mandaue (TEAM) ipangdistino sa lainlaing mga karsada aron magiyahan ang mga motorista kun asa sila moagi nga dili kaayo sila mahasol.
Matud ni Malig-on nga ang fun run sa kapolisan nga magsugod sa Park Mall motadlas sa mga nag-unang karsada nga naglibot sa dakbayan ug mopaingon sa Banilad, dayon ang mga runner mobalik sa Park Mall nga maoy finishing line.
Si Mayor Jonas Cortes ug Bise Mayor Glenn Bercede mangulo usab sa kalihukan agi og pagsaulog karong adlawa Nobiyembre 30 sa Bonifacio Day. Ang monumento sa bayani nga si Andres Bonifacio anaa mahimutang atbang ra sa City Hall sa Mandaue.
Adunay misa nga ipahigayon sa National Shrine of Saint Joseph ug isunod ang pagbutang og mga buwak sa monumento ni Bonifacio.
Inigka-hapon, mga 3,000 ka sakop sa lainlaing relihiyon magpahigayon na usab og kalihukan, apil na ang konsiyerto, anha sa bakante’ng luna sa North Reclamation Area atbang sa Park Mall.
Gipaabot nga magpadayon ang maong suliran sa trapiko sa kadalanan sa maong dakbayan tungod usab sa pagahimoong parade sa relihiyosong katilingban nga pagabuksan sa usa ka dakong parade nga pagasalmotan sa 3,000 nga gidaghanon sa katawhan.
Ang “Jesus Reigns Philippines” nga gilangkoban sa nagkadaiyang relihiyon gikan sa lainlaing dapit sa nasud nga nagtamod sa pagtuo kang Jesukristo magpahigayon usab og parada sa dili pa motambong og konsiyerto. (BANAT NEWS)