Tulo ka missing, patay na

CEBU, Philippines -  Patay na ang tulo ka mga na-missing dihang nalunod ang panagatan nga ilang gisakyan sa lungsod sa Jagna, Bohol atol sa pag-igo sa bagyong Queenie.

Ang mga nakaplagan nga wa nay mga kinabuhi mao sila si  Roque Sandoval, 62, taga Libertad, Misamis Oriental; Adrian Suan, taga Ubay, Bohol; Robinson Ceballos, 32,  taga Jagna, Bohol.

Samtang pabiling missing si Oscar Dejasa, 39, taga Initaw, Misamis Oriental, ug bag-o lang sab nga may mitaho kanila nga missing sab si  Rocky Bantilan, 31, taga Jagna Bohol.

Nalunod ang mga biktima luwan sa pumpboat nga may marka nga “A20” nga maayong pagkabungkag tungod sa kadagko sa balod. Si Police Officer 3 Van Balabat sa Jagna Police Station nga nahinabi sa Banat News miingon nga gikan sa lungsod sa Jagna ang mga mananagat ug padulong unta sila sa Anda, Bohol dihang gikuso-kuso sa balod ang ilang panagatan.

Padayon pa gihapon ang pagpangita sa mga nagpabiling missing nga mananagat human sa pagkuso-kuso sa bagyong Queenie sa Kabisay-an samtang miabot na og pito ka tawo ang namatay.  (BANAT NEWS)