CEBU, Philippines - Duha ka tawo ang gipamusil sa buwag nga krimen nga nahitabo sa dakbayan sa Lapu-Lapu, usa sa mga biktima barangay tanod.
Base sa inisyal nga imbestigasyon ni Police Officer 2 Joseph Cutanda, sa Lapu-Lapu City Police Office- Homicide Section, ang gipatay mao si Pete Sollano, 28, sakop sa grupong Gun-ob Special Action Team (GUSAT).
Si Sollano nakaangkon og samad pinusilan sa walang bahin sa lawas nga milapos sa luyo. Matud ni Cutanda, ang biktima gituohang padulong na mopauli sa ilahang balay dihang nahitabo ang pagpamusil. Ang mga residente sa nahitaboan mibutyag sa kapolisan nga nakadungog ra sila og buto sa armas ug nadunggan nila ang biktima nga misinggit pagpangayo og tabang.
Daling gidala sa Lapu-Lapu City District Hospital ang biktima apan gideklarar kini nga dead-on-arrival.
Sa laing bahin, usa ka Gerald Magsigan, 32, nga usa ka tricycle driver ang gipusil ‘sab sulod sa balay niini sa Baril, Vistabella, Sitio Kagudoy Barangay Gun-ob.
Si Angeline Amoin, kapuyo sa biktima, nagkanayon nga padulong siya motikang sulod sa balay dihang nakadungog siya og buto gikan sa ilahang kusina.
Daling giadto ni Amoin ang ilahang kusina ug nakita niya si Magsigan nga nagkadugo sa ulo. Daling gidala sa Mactan Doctor's Hospital ang biktima ug kritikal ang kahimtang.
Usa ka basiyo sa bala sa kalibre 45 ang nakuha diha sa crime scene.
Matud pa ni Cutanda, sayo nianang adlawa midangop sa Police Station 4 ang managkapuyo ug misumbong nga gihulga sila sa usa ka Garry Canlom kinsa namasangil sa biktima maoy mibuak sa iyang helmet ug gipabuthan siya kaduha sa biktima. Ang kapolisan misubay na sa tanang anggulo sa maong duha ka mga pagpamusil. (BANAT NEWS)