PB gipaabot modeklarar og state of calamity

CEBU, Philippines - Nagpaabot si Gob. Hilario Davide III  sa hunta probinsiyal nga mopasar og resolusyon sa pagdeklarar ubos sa state of calamity ang mga lugar nga naapektuhan sa bagyong Queenie.

Kini aron magamit ang calamity fund sa pagpaayo sa mga nangaguba nga mga istraktura. Ang Provincial Disaster Risk Reduction and Management Office (PDRRMO) nagpahi-gayun pa og assessment sa mga lugar nga naapektuhan sa bagyo. Apektadong mga lungsod ang Malabuyoc, Dalaguete, Alegria ug Boljoon diin lisud ang supply sa tubig.

Matud ni Davide nga nangita sila og dugang water trucks nga mapadala sa lugar ug posibleng ang kagamhanan sa probinsiya muabang og mga water trucks.

Si Baltazar Tribunalo, pangulo sa PDRRMO, nagkanayon nga dili maayong pagkataud ang mga tubo sa tubig hinungdan nadaut kini sa bagyo.

Sumala pa ni provincial engineer Hector Jamora, kasagaran sa mga tubo sa tubig nahimutang sa ubos nga lugar diin pabor sa kadaut kun dunay baha.

Dugang ni Jamora nga paninguhaon nilang mausab ang desinyo sa tubo sa tubig apan nagkinahanglan kini og milyones nga budget.

Sa laing bahin, nasubo si Tribunalo nga may kinabuhi gihapon nga nakalas atol sa pag-igo sa bagyo gumikan kay wala hingpit nakaandam ang barangay level.

Gani matud ni Davide nga ang barangay level mao unta ang labing andam sanglit sila ang unang makaresponde. (Brenda D. Batuto ug USJ-R MassComm Intern Rosamin Lincaro/GMR)

Paghipos sa libud-suroy usa ka tuig

Himuon sulod sa usa ka tuig ang pagpanghipos sa mga libud-suroy sa dakbayan sa Sugbo human namalik ang kapin sa 200 nga gipanghipos sa Action Team for Better Life nga gipahimutang sa gym sa Barangay San Roque.

Matud ni Mayor Michael Rama nga magbutang og tulo ka shifting nga muabog sa mga libud-suroy.

Gipaningkamutan sa dakbayan sa Sugbo nga mahatagan og desenteng pinuy-anan ang mga libod- suroy apan dili buot si Rama nga makadani kini sa uban sa pag-anhi sa dakbayan.

“We don’t want to be giving an impression, come to Cebu and live there and be a night dweller,” matud ni Rama. Sa pagkakaron, puli-puli ang pagpapuyo sa mga night dwellers sa duha ka barangays nga nagpagamit sa ilang gym sama sa Tinago ug San Roque. Gipasidunggan ni Rama ang mga opisyal sa barangay nga nagpagamit sa ilang mga gymnasium.

Ang Department of Social Welfare and Development may programa usab alang sa mga libud-suroy nga gustong mopauli sa ilang tagsa-tagsa ka probinsya.

Tinguha ni Rama nga mahimong zero night dwellers ang dakbayan aron mas musaka pa ang turismo. Gipatuman ang maong programa aron mawagtang ang mga minors sa kadalanan, prostitusyon, tapok-tapok sa mga gangs ug uban pa nga makahugaw sa kadalanan.  (Khacel Anne D. Sanchez/GMR)(BANAT NEWS)