CEBU, Philippines - Human gipaubos sa weather bureau nga signal number 1 ang habagatang bahin sa Sugbo, kagahapon sa alas 3:00 sa hapon si Gobernandor Hilario Davide III mideklara sa pagsuspenso sa klase sa tanang level sa maong dapit.
Ang Provincial Superintendent sa Department of Education (DepEd) nga si Arden Monisit miingon nga hangtud karong adlawa suspendido gihapon ang klase sa tibuok division sa Sugbo.
Si Julius Regner, information officer sa Provincial Disaster Risk Reduction Management Office (PDRRMO) nagkanayon nga nagpakatap na sila og mga impormasyon ngadto sa kalungsuran kabahin sa pag-abot sa bagyong Queenie aron makapangandam ang mga residente.
Matud ni Regner nga 24-oras silang magmonitor ug mangandam sa pag-abot sa bagyo ug gipaubos na kagahapon palang sa “blue alert status” ang lalawigan. Gipahimangnoan ang mga molupyuo sa habagatang Sugbo nga magmatngon ilabi na kadtong nagpuyo daplin sa baybayon ug kasapaan, lupa nga lugar ug sa mga delikado sa pagdahili sa yuta.
Si Commander Weniel Azcuna sa Philippine Coast Guard (PCG) Cebu Station nagkanayon nga gikanselar na ang biyahe sa mga barko sa mga lugar nga maagian sa bagyo. Matud ni Azcuna nga mga alas-12 kagahapon sa udto, na 500 ka pasahero ang na-stranded paingon sa Bohol, Dumaguete, Siquijor ug sa habagatang bahin sa Sugbo.
Padayon nilang monitoron ang bagyo base sa advisory sa Philippine Atmospheric Geophysical and Astronomical Services Administration. Si Queenie nag-irog paingon sa kasadpan sa gikusgon nga 24 kph ug nag-landfall kini kagahapon sa hapon sa Surigao del Sur ug mitadlas sa Northern Mindanao ug karong adlawa gikatakdang mahimutang sa 35km sa amihanang bahin sa Dipolog City ug sa Biyernes sa buntag gilaumang mogawas na kini sa Philippine Area of Responsibility (PAR).
Sa Sabado sa buntag si Queenie gilaumang mahimutang sa 710km sa kasadpang bahin sa Puerto Princesa o sa West Philippine Sea.
Ang mga lugar sa Visayas nga gipaubos sa signal number one mao ang Southern Leyte, Bohol, Southern Cebu, Negros Oriental, Southern Negros Occidental ug Siquijor. Sa Cebu City, gimando ni Mayor Michael Rama nga suspensuhon ang klase sa tanang level sa pangpublikong tunghaan sa dakbayan nunot sa bagyong Queenie.
Giawhag usab ni Tumulak ang mga pribadong tunghaan nga mosunod usab sa pagkanselar sa klase. (BANAT NEWS)