CEBU, Philippines - Tulo ang patay samtang usa ka minor de edad ang naangol sa managlahing pagpamusil sa Metro Cebu sa niaging adlaw.
Patay na nga nakit-an sa kapolisan ang usa ka Roboam Yu Villegas, 23, sa merkado sa Inayawan, dakbayan sa Sugbo.
Nakaangkon ang biktima og samad pinusilan sa ibabaw nga bahin sa tuong dunggan, walang aping ug tiyan.
Samtang usa ka 17-anyos ang nalandig sa tambalanan human gipusil niadtong Martes sa buntag sa Alviola St., Villagonzalo II, Tejero, dakbayan sa Sugbo.
Ang biktima kinsa bag-o lang nahuman sa pagkaon ug padulong unta mohulog og sinsiyo sa water dispenser dihang kalit gipusil sa duha nga nagmotorskilo.
Daling gidala ang biktima sa Chong Hua Hospital gumikan sa naangkon nga samad pinusilan sa tuo’ng bukton, tuo’ng bahin sa lawas ug sa wala’ng liog.
Sa dakbayan sa Mandaue, natusak sa bala ang lawas sa usa ka traysikol drayber nga gipusil patay sa duha ka wala hiilhing lalaki nga nagsakay og motorsiklo sa Sacris Road, Marfa, Bakilid niadtong Martes sa gabii.
Ang biktima mao si Adones Fortuna, 32, taga sitio Tikyan, sa maong barangay.
Bisan nakaangkon og samad pinusilan ang kalawasan sa biktima apan misuway pa unta kini og dagan.
Apan gigukod ang biktima sa mamumuno ug dihang nahagba na sa yuta gitiwasan pa gyud sa pagpusil nga nakaingon sa kamatayon.
Samtang usa ka lalaki ang nakit-an patay sa may batoon nga bahin sa sitio Ylaya, Ibabao, Cordova.
Usa ka Junber Bintolan ang mitaho sa kapolisan nga may nakit-ang patay’ng lawas nga nailhan nga si Jerome Dubalan, 33, taga Summerville Subdivision sa nahisgutang barangay.
Sigun sa mga silingan ni Dubalan nga mugamit og ginadiling drugas ang biktima.
Ang dapit diin napalgan si Dubalan giingong suyopanan og shabu.
Giulo sa pagpusil ang biktima gikan sa tuong dapit ug milugwa ang bala padulong sa wala’ng bahin sa ulo. (BANAT NEWS)