CEBU, Philippines – Usa ka 24-anyos nga lalaki nga gituohang natagak gikan sa usa ka barko ang naluwas sa miagi nga barko sa miaging adlaw.
Ang naluwas mao si Edmar Ricabo taga Palanas, Tanjay, Negros Oriental kinsa nakit-ang nag-utaw-utaw sa kadagatan sa Batangas ug giluwas sa mga crew sa MV Pope John Paul II sa 2Go Shipping Lines nga nahiagi sa dapit.
Si Ricabo mibutyag sa mga awtoridad nga luwan kini sa MV St. Francis Javier gikan sa Manila padung sa Dumaguete City sa Negros Oriental.
Ang maong barko migikan niadtong Sabado sa alas-8 sa gabii gikan sa Manila ug Domingo na sa alas-4 sa hapon napalgan sa MV Pope John II gikan usab sa Manila nga padung sa Cebu City si Ricabo.
"Based on our investigation, according to Ricabo nga naa daw nituklod niya mao natagak siya. Pero matud pa niya di na kaayo siya makahinumdum sa panghitabo kay nakainom siya atong panahuna," matud pang Weniel Azcuna, ang Philippine Coast Guard-Central Visayas information officer.
Si Azcuna miingon nga human mahaw-as gikan sa dagat si Ricabo dali kining gidala sa klinika sa maong barko. Wa hinuot nakitang kadaot sa lawas nga naangkon si Ricabo gawas lang sa kalapoy sa iyang lawas ug hypothermia o ang grabeng katugnaw.
Wa pa matino kun pila ka oras nga nagpautaw-ultaw sa dagat si Ricabo una pa kini naagian sa maong barko alas-4 na sa hapon niadtong Domingo. (Edwin Ian Melecio gikan sa The Freeman) (BANAT NEWS)