CEBU, Philippines - Usa ka 6.2 magnitude nga linog ang mitay-og sa nasud sa Japan sumala pa sa US Geological Survey. Ang mga balay nga sagad ginama sa kahoy nangaguba ug kinse ka tawo ang na-trap sa nangahugno nga buildings.
Ang epicenter sa maong linog nahitabo 10 ka kilometro (unom ka milya) ang gilawmon sa amihanang bahin sa Nagano Prefecture sumala pa sa USGS.
Apan base sa Japan Meteorological Agency, ang linog adunay gikusgon nga magnitude 6.8.
Ang kabalayan nga ginama sa mga kahoy nangahugno samtang adunay mudslide nga nakaali sa mga dalan padung sa mga apektadong lugar.
"It's quite a strong earthquake for an inland one," matud pa sa usa ka opisyal sa Japan.
Nabalaka sila nga nagbilin kini og grabeng kadaot sa mga kabalayan ug mga buildings ug gipahimangnoan ang mga residente nga magbantay kanunay tungod sa posibleng pagdahili sa yuta tungod kay ang nagrabehan sa linog mao ang nakapalibot nga mga bukid.
Tungod sa nahitabo 1,600 ka balay ang nawad-an og kuryente samtang dunay daghang mga tawo nga nangasamdan.
Kapin sa 20 na ka aftershocks ang nabatyagan sa Nagano human sa maong linog ug gipaabot nga mabatyagan pa kini sa mosunod pang mga adlaw
Maayo nalang nga wala’y damage sa tanang pito ka nuclear reactors sa Kashiwazaki-Kariwa plant sa silingang probinsya nga Niigata tungod kay off-line na kini sugod palang niadtong 2011. Samtang ang ubang nuclear plants wa ra maunsa.
Niadtong 2011, usa ka 9.0 magnitude nga linog ang mitay-og sa kadagatan sa Japan ug mimugna og tsunami nga nakapatay og 19,000 ka tawo lakip na ang mga na-missing ug nakamugna usab sa Fukushima atomic disaster. (BANAT NEWS)