CEBU, Philippines - Lima ka suspetsado’ng drug pusher ang nadakpan sa kapolisan sa buwag nga operasyon nga ilang gihimo sa lainlaing dapit sa dakbayan sa Sugbo ug Toledo ingon man sa pipila ka lungsod sa probinsya.
Si Florencio Ouano, 23, lumolupyo sa Barangay Lugon, Daanbantayan nadakpan sa mga polis sa lungsod nga mihimo og buy-bust operation sa miagi’ng adlaw.
Duha ka pakete nga shabu ang nakuha sa mga polis human nila dakpa si Ouano nga mibaligya og shabu sa kantidad nga P300. Didto sa Cordova, nadakpan usab sa mga polis si Wilfredo Cabonita, 42, taga Barangay Don Andres Soriano (DAS) sa dakbayan sa Toledo.
Wala makabantay si Cabonita nga ang gibaligyaan niya og pakete nga shabu balig P200 usa diay ka polis. Nasakmitan pa g’yud si Cabonita og medium sized ug upat pa ka gagmay’ng pakete sa shabu nga kantidad og P32 mil diha nga siya girekisa.
Sa Barangay Tayud, Consolacion nadakpan usab sa kapolisan sila si Juan Pepito Jr., alyas Gingging, 39, nga nagpuyo sa Sitio Tabay ug Alvin Pilapil, 33 nga taga Sitio Baybayon, sakop gihapon sa Barangay Tayud.
Si PO3 Jesson Gayo sa Liloan Police Station miingon nga taud-taod na nila nga gipanid-an ang duha ka dinakpan.
Diha nga girekisa nila si Pepito human sa buy-bust operation, nakuhaan pa g’yud sa mga polis og lain pa’ng pakete sa shabu ingon man duha ka pakete gikan kang Pilapil. (BANAT NEWS)