Desinyo sa balay nga mosukol og katalagman
CEBU, Philippines - Dungan sa pagsaulog sa unang tuig nga sumad sa pagkuso-kuso sa bagyo’ng Yolanda sa Kabisay-an, ang Museo Sugbo mipasiugda og Japanese Sustainable Emergency Architectural for Disaster exhibit.
Ang maong kalihukan nga nagpakita sa mga nindot nga architectural designs nga haum kaayo kun adunay katalagman gisugdan kaniadtong Nobiyemre 8 ug matapos karon pa’ng Disyembre 12.
Base sa international statistics nasuta nga ang Pilipinas usa sa mga nasud nga hazard-prone ug giingong labing exposed sa tropical storm sa tibuok kalibutan.
Ang maong exhibit gitambayayongan kini sa Visayas Association of Museums and Gallery, Inc., University of Shiga Prefecture, ug Japanese Foundation Exhibitions Abroad Support Program.
Gi-feature sa mao nga exhibit ang Emergency Architecture Designs nga gigama ni Professor Juan Ramon Jimenez Verdejo sa University of Shiga Prefecture ug sa iyang mga estudyante sa architecture human ang Japan giigo og tsunami pipila ka tuig ang milabay.
Gipakita sa maong exhibit ang dili kaayo gastoso nga modelo apan durable ug sustainable nga architectural designs sa edipisyo nga puwede’ng mapundohan sa mga mibakwit nga mga biktima sa katalagman.
Ang launching ceremony sa exhibit gipangulohan sa first lady sa probinsiya nga si Jobella Davide uban nila ni Professor Verdejo ug Provincial Tourism Officer Grace Paulino. (BANAT NEWS)
- Latest
