“Fixer,” amigo gikaligo og bala

CEBU, Philippines - Kritikal ang kahimtang sa usa ka gidudahang fixer sa Land Transportation (LTO) ug kauban niini human sila gipamusil sa armadong mga lalaki nga nagsakay og motorsiklo sa Cansaga Bridge, Barangay Paknaan, Dakbayan sa Mandaue.

Si Senior Police Officer 3 Marcos Noval Jr., imbestigador sa Investigation Detection and Management Bureau sa (IDMB) sa  Mandaue City Police Office (MCPO) miila sa mga biktima nga mao sila si Benjamin Cabilon Jr. 32, taga Tugbongan, Consolacion ug Clemente Milano Cruz alyas Kim, 30, taga Sitio Acaji, Barangay Catarman, Lungsod sa Liloan ug fixer sa LTO Mandaue district office.

Matud pa ni Noval nga si Cruz nagmaneho og motorsiklo ug angkas niini si Cabilon atol sa pagpamusil.  Matud pa nga duha ka wala mailhing lalaki nga nagsakay usab og motorsiklo nga nagsunod kanila ang kalit namusil sa duha ug pagkahuman mipabulhot palayo sa dapit ug gibiyaan ang duha nga nalamba sa taliwala sa karsada. Si Cabilon nakabaton og lima ka samad pinusilan sa iyang kalawasan dali nga gihatod sa Mandaue City Hospital apan gibalhin kini ngadto sa Vicente Sotto Memorial Medical Center sa Dakbayan sa Sugbo. Samtang si Cruz nga nakabaton usab og tulo ka samad pinusilan sa iyang kalawasan ug gidala usab sa mao gihapong tambalanan.

Si Noval miingon nga mohimo pa sila og dugang imbestigasyon alang sa pag-ila sa mga wala hiilhing mamumuno nga mga lalaki ug ingon man sa pagsuta sa hinungdan niini.

Apan usa sa ilang gitan-aw mao ang posibleng kalambigitan sa pagka-‘fixer’ sa usa sa mga biktima. (BANAT NEWS)