Manghod gipatay sa maguwang
CEBU, Philippines - Patay ang usa ka 17-anyos nga lalaki human gidunggab sa iyang maguwang dihang nagkaabot sila sa dalan.
Ang biktima naila nga si Edgar Calero Jr., manghod sa suspetsado nga si Carlo Calero, 18, pulos taga B. Aranas Extension sa dakbayan sa Sugbo. Base sa imbestigasyon nga gihimo sa Homicide Section sa Cebu City Police Office nga nagkaabot ang maguwang ug manghod sa dalan.
Apan matud pa nga dihang nasaghiran sa manghod ang bukton sa iyang maguwang nasuko kini ug gikulata ang iyang manghod, wala masayri sa kapolisan duna nay karaang panagbingkil ang duha.
Matud pa nga mikuha og kutsilyo ang suspek ug giduslak ang dughan sa iyang manghod.
Midagan ang manghod nga naangol padulong sa ilang balay samtang ang iyang maguwang misibat human sa hitabo.
Nakasugilon pa ang biktima sa iyang inahan kun giunsa siya sa iyang maguwang ug misulti kini kung kinsa ang midunggab kaniya.
Daling nangayo og tabang ang inahan sa ilang silingan ug dali nga gidala ang biktima sa Cebu City Medical Center apan namatay kini sa paglabay sa pipila ka gutlo.
Samtang ang maguwang mitahan sa kapolisan sa Mambaling Police Station human sa hitabo.
Kasamtangang natanggong sa karsel sa Mambaling Police Station ang suspek ug naghuwat ang kapolisan kun mopasaka ba og kaso ang iyang inahan. (BANAT NEWS)
- Latest
