CEBU, Philippines - Nagtoo ang diyakono nga unang mitan-aw sa mga batang giingong nasudlan og dautang espiritu nga nagsagol na ang nasudlan ug kadtong naratol tungod sa hitabo.
Matud ni Rev. Nicolas Ramos kinsa usa ka resident deacon sa Mary Help of Christians Parish sa Buhisan, Cebu City, nga duna siyay nakitang maoy iyang gituohang “nasudlan” samtang ang uban nadala na lang sa kahadlok dihang iyang gipahigayon ang deliverance prayer.
"Base sa akong interaction sa mga bata, dili tanan possessed. Dunay uban nga mo-react g’yud kung bisbisan og Holy Water ug pahiran og Holy Salt. Duna say wala lang. Ang katong mo-react most likely mao ‘to ang possessed dayon ang dili, mao ‘to ang natakdan lang sa karatol," matud pa ni Ramos.
Sa 12 ngadto sa 14 ka tinun-an sa high school nga gidala sa Mary's Little Children Community sa Tabunok, Talisay City, laing mga 15 usab ang giingong nangalisang apan dili matawag nga grabe, sila kadtong nadala lang sa sitwasyon.
Gibutyag ni Ramos nga nagpahigayon og overnight camping activity ang tunghaan niadtong Biyernes ug nagsugod ang mga “possession” human niadto.
"Kung dunay mga ingon ani nga sitwasyon, mas maayo nga ibuwag ang mga possessed aron dili magtinakuray. Kinahanglang lagyo sila aron tagsa-tagsa sila nga ampoan ug benditahan,” dugang pa ni Ramos.
Si Ramos kanhi seminarista sa Mary's Little Children Community ni Msgr. Fred Kriekenbeek sa wala pa siya misulod isip diocesan seminarian.
Ang kura paruko sa Buhisan nga si Rev. Fr. Lucas Inoc wala sa ilang parokya dihang mibisita ang Banat News tungod kay siya usab ang pangulo sa Divine Mercy ug duna silay pulong kagahapon apan siya maoy nangulo sa misa nga gipahigayon kagahapon sa buntag sulod sa eskuylahan.
Una niini, si Konsehal Dave Tumulak mihimo og stress debriefing activity pinaagi sa physical exercise human ang flag ceremony aron mapagawas sa mga bata ug magtutudlo ang tensyon ug kabalaka.
Usa ka hamubong lecture kabahin sa mass hysteria usab ang gibuhat ni Tumulak sa covered court atubangan sa eskwelahan. (Jessa Tubig/EIM)(BANAT NEWS)