Tinun-an nahagbong sa sapa patay
CEBU, Philippines - Patay ang 7-anyos nga batang lalaki nga tinun-an human nalumos sa sapa nga iyang giduwaan sa batangay Manga, Alcantara atol sa recess kauban ang mga klasmeyt niadtong Lunes sa buntag.
Ang bata nailhan nga si Christian Dave Delarita, grade 2 sa Manga Elementary School ug nagpuyo ra sa maong lugar.
Matud ni Sr. Insp. Alfredo Kuhay Jr., hepe sa Alcantara Police, nga atol sa recess miadto sa usa ka sapa distansiya sa tunghaan ang biktima ug kaubanan.
Apan nahibalik sa tunghaan ang mga classmate apan wala si Delarita.
Matud ni Kuhay nga usa ka residente ang nakabantay sa bata nga buhi pa didto sa sapa pasado ala una sa hapon.
Alas 6 sa gabii nabalaka na ang ginikanan sa bata sanglit wala pa nauli hinungdan nga nagpakitabang na sila sa barangay ug nanawag sa maestro.
Alas 10 sa gabii nakit-an mismo sa amahan sa bata nga naglutaw lutaw na ang patay’ng lawas niini sa sapa sa may utlanan sa barangay Malalay, lungsod na sa Ronda.
Ang mga klasmeyt niasoy nga nahagbong ang biktima ug nisuway pa pagkupot sa 10-anyos nga klasmeyt.
Gitug-an ni Kuhay nga sige na og adto ang mga bata sa sapa aron manguha og piyo o mga lambay sa sapa. (BANAT NEWS)
- Latest
