CEBU, Philippines - Human sa giingong pagpasagad sa doktor ug medical personnel sa Asturias Rural Health Unit (RHU), ang Department of Health (DOH)-7 mirekomendar nga pabutangan ang maong RHU og mga doktor nga moatiman sa pasyente bisan unsang orasa.
Gawas niini, girekomendar usab sa DOH nga ibalhin duol sa entrance ang emergency room sa RHU ug pasumitihon usab sila og compliance report ngadto sa DOH-7.
Kung dili sila motuman niini, pasirad-an sa DOH ang infirmary niini, kini nagpasabot nga di na sila tugotang mo-admit og mga pasyente gawas sa mga pasyente sa birthing center.
Gimando usab sa DOH nga ipaubos ang mga personnel sa RHU sa capability training ilabi na sa ICD-10 (International Classification Diseases) training.
Niadtong Hulyo 20, 2014 ang magtiayong Ritchie ug Cheryl Torion uban sa ilang mga paryente ang midala sa ilang siyam ka buwan nga anak nga si Mac Aldrich diha sa infirmary tungod sa hilanat ug suka kalibang.
Apan giingong way nakaatiman tungod kay day-off si Dr. Resalde Climaco kinsa maoy municipal health officer sa lungsod.
Ang magtiayong Torion midala sa ilang anak sa usa ka pribadong tambalanan sa dakbayan sa Sugbo apan kritikal na ang bata tungod sa “severe dehydration.” Ang Hunta Probinsiyal miawhag sa DOH-7 nga mopahigayon og fact-finding investigation sa maong hitabo. (BANAT NEWS)