Hain na ang scraps sa CCMC?

CEBU, Philippines - Gustong paimbestigaran ni Konsehal Sisinio Andales sa Office of the Ombudsman kung hain na napunta ang mga scraps nga nakuha pagguba sa Cebu City Medical Center nga gi-demolish pipila ka bulan na ang nakalabay.

“I am moving for proper investigation on this matter… let us name names because we might be dragging other people who are not involved in taking custody to the scrap of CCMC,” ang pamahayag ni Andales sa iyang privilege speech sa nahitabong session kagahapon sa buntag.

Gihagit ni Andales si Cebu City Mayor Michael Rama sa paghatag og pangalan sa mga tawo nga adunay kalabotan sa mga scraps sa CCMC.

Hinuon si Rama mipadayag nga uyon siya sa maong imbestigasyon nga gipangayo ni Andales.

Gimandoan ni Rama si Engineer Jose Poblete pangulo sa Office of the Building Office ug si Konsehal Mary Ann De los Santos sa pag-andam sa mga dokumento may labot niini.

Giangkon sa mayor nga wala siya’y ideya kung asa na karun ang mga nahisgutang scraps nga nakuha sa pagguba sa CCMC.

Si Andales miingon nga magamit unta ang kwarta nga halin sa makuha sa mga scraps alang sa tukorong bag-ong CCMC. (BANAT NEWS)