CEBU, Philippines – Duha ka managsuon ang patay human nga nabag-iran sa usa ka bus de pasaheroan ang gisakyan nila nga traysikol diha sa Barangay Guadalupe, Carcar City.
Ang namatay naila nga sila si Harry Saramosing, 38, ug ang magulang niini nga babaye nga si Peperlita Anonsiado, 40, nga pulos taga Barangay Guadalupe, Carcar.
Dali pa unta nga gidala sa Carcar District Hospital ang duha apan nakabsan gayud sa ilang kinabuhi.
Samtang ang drayber sa Librando Bus naila ‘sab nga si Rogelio Alipin, 36, nga gitanggong na karon sa Carcar City Police Station.
Matud pa ni Senior Police Officer 1 Eduardo Bagol, ang traffic investigator sa maong siyudad, gikan sa Poblacion ang magsoon gikan naghatod og baboy. Samtang ang bus paingon sa dakbayan sa Sugbo nga gikan pa sa Badian ilang gikasugat sa nahisgutang dapit.
Dugang pa ni Bagol nga nawad-an matud pa og kontrol sa tricycle si Harry pag-abot sa Sitio Cristo Rey, Guadalupe nga kurbadahon ang dalan ug mikawat sa pikas nga lane hinungdan nga nabag-iran kini sa bus nga iyang gikasugat.
Ang managsuong nakaangkon og grabeng kadaot sa ilang mga lawas nga maoy nakaingon sa ilang kamatayon.
Matud pa sa kapulisan nga wala sab sila’y nakuha nga lisensiya gikan ni Saramosing.
Mag-atubang og kasong reckless imprudence resulting to homicide and damage to property ang atubangon sa drayber sa bus. – /EIM) (BANAT NEWS)