Drainage project nakamugna’g problema sa trapiko

CEBU, Philippines - Ipakuha na gyud ni Mayor Michael Rama ang mga dagko’ng bato ug ubang butang nga nakababag sa karsada dapit sa tungason nga bahin sa Veteran’s Drive paingon sa Marco Polo Plaza Hotel.

Wala malipay si Rama nga nakaagi sa mao’ng dapit nga kanunay’ng makasinati og grabe’ng problema sa kahuot sa mga sakyanan kay hagip-ot na kaayo ang karsada tungod sa mga bato nga gibutang.

Ang Department of Public Works and Highways (DPWH)-City Engineering District maoy naghimo sa drainage project pinaagi sa pagpadaku ug pagpalawom sa agianan sa tubig-baha.

Gani ang bag-ohay pa lang nga gipanindot nga aseras sa mao nga dapit naapil sa giguba kay naigo sa gipalapdan nga drainage system. Sa milabay’ng semana, adunay daku kaayo nga backhoe nga diha ra gipahimutang sa karsada.

Imbes duha ka lane ang bahin sa karsada, gigamit sa DPWH ang usa ka lane mao nga ang mga sakyanan nga magsugat adto na mag-ilog sa pag-agi sa nahabilin nga gamay’ng bahin sa karsada.

Pagkakaron gikuha na sa DPWH ang dako’ng backhoe apan gipulihan kini og mga dagko’ng bato nga anaa gipahiluna sa usa ka bahin sa karsada.

Si Rama nimando sa pagpaundang sa trabaho samtang dili mapangitaan sa DPWH og sulbad ang problema sa trapiko sa mao nga dapit.

Daghan ang nagtuo nga ang pagpadako ug pagpalawom sa drainage system sa tiilan nga bahin sa Veterans Drive dapit sa eskena Salinas Drive dili makasulbad sa problema sa pagbaha sa maong dapit.

Kini tungod kay samtang gipadak-an ug gipalawman sa DPWH ang drainage system kilid sa bungtod, apan walay gawasanan ang tubig sa eskina nga bahin ug gipaabot nga mahitabo ra gihapon ang lunop. (BANAT NEWS)