Demolisyon nagkagubot
CEBU, Philippines - Nanglupad ang mga bato, improvised teargas atol sa pagpadayon sa demolisyon kagahapon sa buntag sa Sitio Mahayag, Barangay Subangdaku, Dakbayan sa Mandaue sa daplin sa Mahiga Creek.
Panggubaon unta ang mga karatula ug mga tulda nga gihimong pinuy-anan sa kapin sa 30 ka pamilya nga namalik sa pagpuyo sa maong dapit human sila gidemolis niadtong Oktubre 24.
Dunay 154 ka pamilya nga gipalayas sa maong lugar tungod kay nabutang sila sa danger zone.
Apan wa damha sa demolition team pinangulohan ni Carlo Ybañez nga giabagan usab sa kabomberohan ug mga sakop sa kapolisan ang pagsukol sa mga residente. Bisan ang hangyo ni Atty. Aaron Pedrosa kinsa maoy Sanlakas secretary general nga diha sa maong dapit aron pagtabang sa mga residente wala makapugong sa demolisyon.
Pipila ka mga sakop sa demolition team ang naangol tungod sa pagkaigo sa mga bato. Ang mga residente dili ganahan sa relocation site sa Barangay Paknaan nga ilang balhinan tungod kay wala kini giandam sa siyudad ug layo sa ilang panginabuhian.(BANAT NEWS)
- Latest
