Mga piniriso gimisahan ni Palma
CEBU, Philippines - Nipahigayon si Cebu Archbishop Jose Palma og misa sa Cebu City Jail kagahapon isip kabahin sa Prison Awareness Week.
Matud ni Palma nga tinguha nila nga mapaabot ngadto sa tanang piniriso nga sila gihinumdum gihapon sa simbahan ug sa komunidad.
Awhag ni Palma ngadto sa mga piniriso nga bisan sa kalisud sa ilang kahimtang dili gyud mawagtangan og paglaum dungan sa pagpahinumdum nga kitang tanan anak sa Diyos.
Si Mayor Michael Rama nga nitambong sa kalihukan miingon nga sa iyang administrasyon gihatagan og pagtagad ang problema sa prisohan sa siyudad.
Ang kagamhanan nigahin og dakung pundo aron mahimong hamugaway ang prisohan.
Gikalipay sa mga piniriso sa Cebu City Jail ang pagduaw ni Palma kanila. Matud ni Kenneth Patero-Yap kinsa tulo ka tuig na nga napriso tungod sa kasong pagpayuhot og ilegal nga drugas nga daku ang ilang kalipay nga wala sila kalimti sa simbahan.
Asoy ni Yap nga mapasalamaton sila tungod kay nahatagan sila og higayun nga makauban ang sinugo sa Diyos ug nadunggan usab nila ang mga pulong sa Ginoo nga nakahatag kanila og paglaum. (BANAT NEWS)
- Latest
