CEBU, Philippines - Patay na nga nakita sa iyang mga silingan ug paingon na sa pagkadugta ang lawas sa usa ka 49-anyos nga lalaki nga gidudahang naghikog sulod sa iyang balay, diha sa Plaza Housing, Barangay Busay ning dakbayan sa Sugbo.
Ang nagpakamatay naila nga si Hernanie Dawat, nagpuyo ra sab sa maong lugar.
Matud pa ni Police Officer 1 John Erick Samosa sa Homicide Section sa Cebu City Police Office kini mitug-an nga pipila ka adlaw na ang nakalabay nawad-an og kwarta nga P8 mil si Dawat human kini gikan nag-inom.
Giingong pwerteng guola niini sanglit wala man siya’y ikabayad niini. Ang silingan niini nga si Percival Solis miadto sa balay ni Dawat kay duna untay tuyo, apan sa iyang paglili sa balay iya na lang nakita nga nagbitay na si Dawat.
Nakuha sa kapulisan ang electrical wire nga maoy gigamit ni Dawat sa paghikot sa iyang liog ug ang usa ka suicide note. Sa suicide note gipasabot ni Dawat nga kini nagpakamatay gumikan sa iyang balatian nga wala sab masayod ang iyang agalon ug mga silingan.
Apil pa nga nakabutang sa suicide note ang petsa nga iyang natawhan ug ang petsa kanus-a kini nagpakamatay nga iyaha pang gipirmahan.
Ang kapulisan nagduda usab nga ang usa sa hinungdan sa pagpakamatay sa lalaki naggumikan sa kaguol sa pagkawala sa P8,000 nga salapi nga gipadala sa iyang agalon aron unta ipalit og materyales sa gipatarbaho nga panimalay. (BANAT NEWS)