CEBU, Philippines - Usa ka inahan ug ang iyang 11-anyos nga anak ang nangaangol human kini natagakan sa usa ka puthaw nga tapangko (canopy) nga gibutangan og billboard sa usa ka establisamento kagahapon sa buntag samtang sila naglakaw sa dalan V.Gullas ning dakbayan sa Sugbo.
Ang mga biktima naila nga sila si Cynthia Andrada, 34, ang anak niini nga si Shean, nga nagpuyo sa Barangay T. Padilla ug gidala sa Chong Hua Hospital tungod kay nakaangkon og grabeng bun-og sa kalawasan.
Si Lilia Cebacob usa ka vendor sa lugar nga nakakita sa hitabo nagkanayon nga nakadungog siya og kusog nga lagubo ug sa iyang pagtan-aw nakita nga ang duha ka biktima nadat-ugan na sa canopy sa Jacky’s Fashion Wear.
“Nakadungog ko naay nikuto mao ‘to nidagan ko, paglingi nako naay nadat-ugan natagak ang billboard (canopy) diha, mao ‘to nanawag ko’g tabang. Ana ko tabangi kay naay nadat-ugan kay ang tindera ug guwardiya nidagan man sa sulod,” sigun pa ni Cebacob. Ang guwardiya sa maong establisamento nga si Ramil Perotcho sa CARAGA Security Agency mitug-an nga mibanda sa iyang likod ang canopy. “Nakadungog ko nikuto unya naay natagak mao ‘to giingnan ko nila guard padaplin wala man ko kabantay. Unang niigo nako kay ang trapal man, mao ‘to nakadagan ko’g dali-dali pero naigo gyud ko diri dapita sa likod,” dugang pa ni Perotcho.
Iya’ng nakita matud pa si Cynthia nga nangayo og tabang. Matud niya dunay dakong samad sa abaga ug mihangyo nga birahon ang iyang 11-anyos nga anak nga natabunan.
Dali sab nga gibira sa guwardiya ang bata nga matud pa dili na makabarog ug kini miingon pa niya nga “naa pa baya ko’y klase ugma kuya.” Sa pagkutlo niining balita wala pa matino kung kinsay angay manubag sa maong aksidente, apan gipaabot nga modemanda og danyos ang mga biktima ngadto sa maong establisamento.
Nasayran usab nga gagmay kaayo nga screw nga dos y media ang gigamit paghawid sa maong tapangko nga gituohang wala makapugong sa gibug-aton niini. (BANAT NEWS)