Wala nay drug test sa barangay
CEBU, Philippines - Kadto’ng mga adik nga kawani sa barangay dinhi sa dakbayan sa Sugbo makaginhawa na og luag tungod kay ang City Hall wala na’y ipahigayon nga kinalit nga drug test sa kabarangayan karong tuiga.
Si Dr. Alice Utlang, pangulo sa City Office for Substance Abuse Prevention (COSAP), mitug-an nga ang kakuwang og medical technologist sa Cebu City Health Department maoy nakaproblema kanila.
Matud ni Utlang nga ang Cebu City Health department aduna na lay usa ka medical technologist kay ang uban nang-resign na sa ilang trabaho.
Gipasabot sa pangulo sa COSAP nga kun ang bugtong medical technologist mouban kanila sa pagpahigayon og surprise drug test sa tanang kawani sa barangay, mabiyaan ang iyang trabaho sa City Health.
Si Utlang miingon nga ang gihimo nila karon mao na lang ang pagpahigayon og random drug test diin ang hingtungdang kawani awhagon nila pag-adto sa City Health department aron mosumiter og sampol sa ilang ihi.
Gibutyag ni Utlang nga misugod na sila pag-hire og medical technologist aron nga makapaspas sila sa pagpahigayon og surprise drug test karong sunod tuig.
Sa laing bahin, gitug-an ni Utlang nga paspasan gayud nila ang pagpahigayon og drug awareness sunod tuig kay nakadawat sila og report nga may 8-anyos na nga tinun-an sa usa ka tunghaan dinhi sa dakbayan nga namatud-an nga tiggamitan og gidili nga drugas. (BANAT NEWS)
- Latest
