CEBU, Philippines - Kadto’ng suspetsado nga druglord nga nadakpan didto sa isla sa Cabul-an, Buenavista, Bohol ug nasakmitan og P11.8 milyones nga shabu ug daghang armas mitug-an na sa iyang mga kauban sa grupo.
Si Dominador Hera gisukit-sukit kini sa mga polis nga nakadakop kaniya ug sa ngadto-ngadto mitug-an na kun kinsa ang mga kauban niya sa grupo ug target na usab sila sa operation sa kapolisan.
Daghan ang mga ngalan nga gitug-an ni Hera apan ang kadagkoan sa kapolisan mihangyo sa media nga dili ibulgar ang ilang mga ngalan. Sayo pa gituohan nga si Hera kakonsabo sa grupo niadto’ng napatay nga kanhi polis nga si PO2 Owen Rosales.
Gituohan nga ang grupo ni Hera, kinsa nagpuyo kaniadto sa Barangay Pasil, adunay mga kakonsabo nga druglord dinhi sa dakbayan sa Sugbo.
Ang mga usa ka kilo kapin nga shabu nga nasakmit gikan ni Hera maoy gihulagway nga labing dako nga kalampusan nga naangkon sa kapolisan sa ilang kampanya batok sa drugas dinhi sa rehiyon.
Si Police Regional Office (PRO)-7 direktor Prudencio Tom Bañas midasig pa sa iyang mga sakop nga mohingusog pa g’yud sa paghimo’g kampanya batok sa gidili’ng matang sa drugas.
Gawas sa shabu, ang kapolisan nakasakmit usab gikan ni Hera og usa ka Garand rifle, 357 magnum revolver, usa ka AR 15 rifle, duha 9 mm. nga pistola ug mga bala. (BANAT NEWS)