Bana sa ‘naghikog’ nga polis nagduda
CEBU, Philippines - Di kadawat ug dili makatuo ang bana ni Police Officer 1 Heidi Garcia nga naghikog ang iyang asawa sa miaging buntag gamit ang armas sa usa ka policewoman diha sa may dalan Urgello sa dakbayan sa Sugbo.
Si PO1 Roy Benjie Garcia, Tourist Police sa Tagbilaran City Police Station miingon nga di g’yud siya motuo nga naghikog ang iyang asawa.
Matud pa niya nga nahinabi sa mga tigbalita nga nahibulong dihang gitawgan siya sa kapolisan sa dakbayan sa Sugbo nga patay na ang iyang asawa.
Sumala pa ni Garcia nga isip polis maglisod siya sa pagtuo niini sanglit diha sa kwarto ni PO1 Cyrelle Marie Bayate nga nadestino sa Parian Police Station nahitabo ang insidente.
Hinuon iyang paabuton ang resulta sa imbestigasyon sa Scene of the Crime Operations (SOCO) ilabi na sa paraffin test kang Bayate nga gihimo niadtong Biyernes sa hapon.
Kun mapamatud-an nga gipusil gyud ni Bayate ang iyang asawa sumala pa ni Garcia pasakaan gayud niya kini og kaso.
Naglibog karon si Garcia kun unsaon niya pagpasabot sa iyang mga anak ang kamatayon sa ilang inahan sanglit ang kamagulangan 7- anyos pa lang ug ang kamanghoran 5-anyos.
Dugang ni PO1 Garcia nga sulod sa walo nila ka tuig nga pagminyo wala sila makasugat og grabe nga away ug matud pa niya wala gani sila kasugat og dagkong panaglalis gawas lang sa pinansyal nga problema.
Gani ang bayaw ni Garcia nga si Jeffrey Torion nga nagpuyo sa magtiayong Garcia mitug-an sa mga tigbalita nga wala kini makabantay sukad nga nag-away ang magtiayon.
Apan ning bag-ohay lang, dihang nadestino sa dakbayan sa Sugbo ang namatay niya nga asawa, nakamatikod si Garcia nga suod kaayo sila si PO1 Bayate.
Sunod na lang niya nga nahibaw-an nga namatay na ang iyang asawa ug ang pusil nga nakapatay service firearm ni PO1 Bayate. (BANAT NEWS)
- Latest
