Niputol sa ulo ug kinatawo nadakpan

CEBU, Philippines - Gipaatubang sa sakop sa media ang suspek sa pagpatay sa usa ka lalaki nga giputlan og ulo ug kinatawo sa Sitio Makatol, Barangay Biga dakbayan sa Toledo human kini masikop sa kapulisan.

Giila ang suspek nga si Glenn Aban Versaga, 21, sa maong barangay kinsa miangkon dayon sa pagpatay kang Alonie Olasima, 39, taga lungsod sa Tuburan.

Usa ka testigo ang misumbong sa mga tanod kabahin sa krimeng gihimo sa suspek kay matud pa human nasayod sa gibuhat niini daw nakonsensiya nga wala siya’y gihimo.

Matud pa ni Superintendent Ricky Delilis ang hepe sa Toledo City Police nga ang ig-agaw sa suspetsado nga nahibalo sa maong krimen maoy yawe sa pagkasikop niini.

Ang kapitan sa maong barangay nga si Jonathan Sepada mitawag og pulis sa dihang ilang nasayran nga si Versaga ang suspek sa maong pagpatay. Ang ulo sa biktima gilubong sa suspek 800 metros gikan sa lugar diin gilabay ang patay’ng lawas niini, apan pabiling gipangita ang kinatawo sa biktima.

Ang maong suspek gipresentar kang Senior Superintendent Noel Gillamac sa Cebu Provincial Police Office CPPO.

Ang suspek mibutyag nga iyang nabuhat ang krimen tungod kay gibaharan siya niini nga patyon dihang nagkasugat sila niadtong Nobiyembre 1 ug tungod sa bahad giunhan na niya kini. Sumala pa niya gibangkaw, gidunggab ug gibara niya ang biktima ug pagkahuman giputlan sa iyang ulo ug kinatawo ug gilabay sa usa ka bangag.

Dugang ni Gillamac nga nasulbad na ang maong krimen apan ila pang imbestigahon pag-ayo ang maong suspek kay nagtuo kini nga dili lamang usa ka tawo ang nihimo sa maong krimen.(Raymond Abarcas ug Jojo Ugdol/EIM)(BANAT NEWS)