Cybercrime makaalarma na
CEBU, Philippines - Ang Anti-Cybercrime Group (ACG) sa Central Visayas mitug-an nga ‘alarming’ na ang cyber crime dinhi sa Sugbo human sa nagsunod nga pagpanakop sa langyaw nga namiktima og mga batang Filipino.
Niadtong Miyerkules sa gabii, usa ka German ang gidakop sud sa iyang balay human giingong mibiktima sa usa ka 14-anyos nga anak sa iyang labandera nga kakunsabo niini sa cyber crime operations.
Ang nadakpan mao si Dietman "Timmy" Moenig, 65, nagpuyo sa Golden Meadow Subdivision sa Barangay Gabi sa Cordova.
Ang 31-anyos nga inahan sa bata kusganong mihimakak nga iyang gibugaw iyang anak. Ang operasyon sa duha nabisto tungod sa report sa silingan sa maong langyaw.
Si Inspector Alexander Nuñez, hepe sa Cordova Police Station nagkanayon nga base sa nadawat nilang report, dunay mga menor de edad nga magsige og sulod sa balay sa langyaw.
Usa ka search warrant ang giisyu ni RTC Judge Mercedita Dadol- Ignacio Branch 28 sa dakbayan sa Mandaue niadtong Oktubre 27. Nakuha diha sa balay ang usa ka laptop nga adunay mga hubo nga mga litrato sa mga nagkalain-laing mga bata og tulo ka cellphone.
Ang 14-anyos gikostudiya na sa Department of Social Welfare and Development samtang si Moenig gitanggong na sa Cordova Police Station. Ang duha pasakaan og kasong kalapasan sa Republic Act 9208 o Anti- Trafficking in Person's Act of 2008 ug Child Abuse.
Samtang si Senior Inspector Michael Vertudazo ang hepe sa ACG nagkanayon nga ang nadakpan usab nilang Briton nga si Christopher John Bragoli, 57, migamit kini sa Facebook aron mokontak og mga biktima.
Gidakop siya human kini nagdala og duha ka babaye sulod sa hotel sa dakbayan sa Sugbo nga nag-edad pa lang og 15 ug 19 anyos.
Ang duha miangkon nga gihagad sila niini nga makig-sex apan ilang gibalibaran apan misugot sila nga kuhaan og hulagway nga way sapot.
Ang Provincial Council for Women and Children motabang sa mga biktima sa Briton kung ang kaso batok sa mga suspetsado mapasaka na kini matud pa ni Bise Gobernador Agnes Magpale. (Christell Fatima Tudtud, Romeo Limpangog, Jojo Ugdol ug Brenda Batuto/EIM)
- Latest
