3 mayor nagkahiusa pagsulbad sa baha
CEBU, Philippines- Nagkauyon ang mga opisyales sa tulo ka dakbayan sa Sugbo, Mandaue ug Talisay nga gub-on ang nakababag sa sapa nga maoy hinungdan sa baha.
Kini atol sa inter-city drainage summit nga gipatawag ni Cebu City Mayor Michael Rama tumong sa pagsulbad sa problema.
Sa presentasyon ni Alvin Santillan sa Cebu City Disaster Risk Reduction and Management Office, iyang girekomendar ang pag-imbentaryo sa mga creeks ug ang mga agianan sa tubig sa tagsatagsa ka hurisdiksiyon ug ang istriktong pagpatuman sa ordinansa sa basura ug pagsagbot-sagbot.
Si Talisay City Mayor Johnny delos Reyes sa iyang pakigpulong nipadayag nga ang katawhan ra usab ang nakastigo sa gibuhat ngadto sa kinaiyahan.
Sama sa gipadayag ni Rama, si Mandaue City Mayor Jonas Cortes niawhag usab sa kahiusahan sa pagsulbad sa problema. Gisanglitanan ni Cortes ang plano sa Mega Cebu diin iyang nakita nga daghan butang nga kaniadto pa angayan gibuhat sa pagsulbad sa problema. (BANAT NEWS)
- Latest
