CEBU, Philippines – Patay na nga nadiskubrehan ang 28-anyos nga lalaki kinsa naghigot og pisi sa iyang liog sulod sa gipuy-an niini sa Pagsabungan, dakbayan sa Mandaue alas 4 pasado sa hapon sa niaging adlaw.
Ang namatay mao si Garry Bulanag, nagpuyo sa maong dapit ug si Mira Noynay nga silingan ang nakataho sa buhatan sa kapolisan.
Si SPO1 Gregorio Cabizares miingon nga ang mga kauban sa panimalay wala’y nasayud sa hinungdan sa paghikog niini.
Samtang usa ka amahan ang nagkutlo sa iyang kinabuhi sa niaging gabii sa sitio Kagudoy, Basak, dakbayan sa Lapu-Lapu. Ang nagpakamatay nailhan nga si Roberto Tumulak, 47-anyos.
Giingong nanirado sa pultahan si Tumulak human giagda og kaon sa anak hinungdan nga gisuwayan pagtan-aw sa bintana apan maoy nakit-an nga nagbitay na.
Ang 16-anyos nga anak babaye miingon nga alas 5 sa hapon nagka-estorya sila sa ilang amahan ug nanugo sa iyang igsuon nga magpapalit og ilimnong makahubog.
Dihang nahubog na, nangita og pisi si Tumulak ug nisulod sa kwarto. – /GMR) (BANAT NEWS)