Kusog ang halin sa buwak

CEBU, Philippines – Mas kusog ang halin sa buwak karong tuiga itandi sa niaging tuig sumala pa sa mga vendors. Si Alexander Monteclar, tagdumala sa Alex Flowers sa dalan P. del Rosario, dakbayan sa Sugbo, miingon nga misaka ngadto sa 80 porsiyento karong tuiga ang iyang ganansiya.

Sagad sa nahalin mao ang Malaysian mums ug orchids nga sagad niini kolor puwa, violet ug puti ang kanunay gipalit sa mga tawo apan ang puti ang labing halin nga kolor sa buwak karong tuiga.

Matud ni Monteclar nga wala mosaka ang presyo sa buwak karong tuiga ug sama lang gihapon sa normal nga adlaw ug kun dunay mohangyo ila gihapon pahangyoon.

Apan reklamo ni Monteclar nga niadtong Oktubre 31 sa buntag gipangkompiskar sa Prevention, Restoration, Order, Beautification and Enhancement (PROBE) ang ilang tinda nga wala’y warning.

Dugang ni Monteclar nga maayo na lang gamay ra ang nakuha sa PROBE dili sama sa iyang kauban nga nahurot gyud ang tinda nga mobalor og P15 mil.

Hangyo ni Monteclar sa hepe sa PROBE, Raquel Arce, nga bisan lang unta niadtong adlawa tagaan sila’g gamay nga konsiderasyon apan matud pa niya bisan gamay nga warning wala gyud mohatag si Arce ug gideretso og kuha ang ilang mga buwak nga gibutang nila sa ilawom sa ilang sakyanan nga gi-park kilid sa dalan.

Apan nalipay na lang sab siya tungod kay dihang nahibawo ang iyang supplier sa gidangatan sa iyang tinda, wala na lang siya pabayra niini. – /GMR) (BANAT NEWS)