‘Zero accident’ sa bus sa kalag-kalag

CEBU, Philippines – Gihulagway sa Cebu Provincial Bus Operators Association nga “zero accident” ang kalag-kalag.

Matud ni Julieto Flores, tigpamaba sa CPBOA, nga gituman nila ang ilang commitment ngadto sa Land Transportation Office ug  Land Transportation Franchising and Regulatory Board.

Matud ni LTO-7 Director Arnel Tancinco nga overloading ang sagad nga kalapasan nga nahimo sa mga pangpublikong sakyanan atol sa kalag-kalag.

Sobra sa 500 ka bus ug mini-buses ang naghakot sa mga pasahero sa tibuok probinsiya sa Sugbo atol sa kalag-kalag.

Sa dakbayan sa Sugbo, gipahibawo sa City Traffic Operations Management (CITOM) nga hapsay ang kadalanan dapit sa mga sam-ang.

Matud sa operations officer sa CITOM, Joy Tumulak, nga dunay oras nga medyo naghuot ang mga sakyanan apan napahapsay ra kini ug wala sila’y nadawat nga report kabahin sa emerhensiya.

Sa kinatibuk-an, gihulagway sa kapolisan nga malinawon ang kasaulogan.

Ang deputy director for administration sa Cebu City Police Office, Supt. Alet Virtucio, mitug-an nga wala’y dagkung panghitabo nga natala sa duha ka adlaw nga kalihukan.

Nabantayan ni Virtucio nga mas daghan ang mga tawo nga nibisita sa mga sam-ang panahon sa gabii kaysa buntag.

Ang dakbayan sa Sugbo ang gipaubos sa full alert status sugod niadtong petsa 31 sa Oktubre diin bisan og duna’y mga panghitabo sa dakbayan apan gikatahong dili konektado sa pagsaulog sa kalag-kalag.  – /GMR) (BANAT NEWS)