CEBU, Philippines – Patay na nga nadangat sa tambalanan ang usa ka babaye nga gikatahong gipusil sa iyang live-in partner sa miaging gabii diha sa Sitio ISKP, Barangay Sambag I sa dakbayan sa Sugbo.
Ang namatay naila nga si Caridad Parantar, 29, samtang ang gipangita pa ang iyang kapuyo nga si Edmundo Ursal, 43, kinsa igo rang midala sa biktima sa tambalanan ug wala na igkita sa mga polis.
Base sa imbestigasyon sa kapolisan nga ang biktima ug ang suspek naglalis pa sa wala pa mahitabo ang pagpamusil. Sumala pa sa nag-abang sa balay sa duha nga usa ka langyaw nga si Stephen Yew, nakadungog siya og buto sa armas.
Dihang iyang gisusi, nakita niya ang suspek nga nagdali og gawas sa iyang kwarto ug karga niini ang iyang live-in partner nga nagkadugo.
Mipara og taxi ang maong langyaw ug gitawag niini ang lain pang langyaw nga nag-abang sa balay aron ihatod ang biktima kuyog ang suspek. Apan dihang naabot na sila sa Sacred Heart Hospital gideklarar ang biktima nga patay na.
Apan nahanaw lang ang suspek human niya nahibaw-an nga patay na ang iyang live-in partner ug padayon karong gipangita sa kapolisan. (BANAT NEWS)