CEBU, Philippines - Patay ang usa ka 22- anyos nga lalaki human nahabwa ang ginhawaan niini sa dihang kini gidunggab sa iyang silingan nga 65- anyos nga giingong bagis sa ilang lugar sa Barangay Cogon, Tuburan.
Ang biktima naila nga si Ramil Dañas, samtang ang suspetsado naila nga si Felipe Caseda pulos nagpuyo sa maong lugar.
Matud pa ni Police Officer 3 Roberto Rondina sa Tuburan Police Station nga nahinabi sa Banat News nagkabikil ang duha niadtong bulan sa Hunyo atol sa ilang pista.
Sumala pa ni Rondina nga si Caseda giingong kanunay nga mangilkil og kwarta sa mga tawo sa lugar aron ipalit og ilimnon ug apil sa sige niini nga pangayoan ang biktima.
Gihulagway ni Rondina nga bisan og 65-anyos na ang suspetsado apan abtik pa gihapon kini ug mahadlok ang mga tawo sa iyaha.
“Abtik bisan gulang na ni siya, mao g’yud na iyang trabaho tigpangayo-an og kwarta para inom,” sigun pa ni Rondina base sa imbestigasyon.
Niadtong Huwebes sa hapon human sa trabaho sa biktima ug ang iyang lima ka kauban nga gisuholan nga manaka og lubi gipangayoan na ‘sab kini sa suspek dihang ilaha kining nalabyan nga nag-inom.
Apan kay wala pa mabahin ang ilang suhol mibalibad ang biktima ug milakaw uban sa iyang barkada, apan giingong misunod ang suspetsado nga niadtong tungora giingong hubog na ug diretsong gidunggab og 12-pulgadas nga jungle knife ang tiyan ni Dañas.
Dali unta nga gidala sa Tuburan District Hospital ang biktima apan nakabsan gayud kini sa iyang kinabuhi.
Ang suspetsado misulay og ikyas apan tungod sa kahubog naapsan ug nasikop kini sa mga barangay tanod.
Sumala pa ni Rondina nga sa dihang nahuwasan na ang suspetsado sulod sa prisohan pwerte niining pagmahay sa iyang nabuhat. (Jojo C. Ugdol/EIM)(BANAT NEWS)