CEBU, Philippines - Gitulis sa duha ka armadong lalaki nga nagsakay og motorsiklo ang Cold-S Convenience Store sa dalan A. S. Fortuna, Banilad, dakbayan sa Mandaue alas 2 pasado sa niaging kadlawon.
Si Senior Police Officer 4 Fernando Gabutero sa Presinto 4 sa Mandaue City Police Office (MCPO) miingon nga ang duha ka wala hiilhing lalaki misulod sa nahisgutang tindahan ug nagpatuo nga mga kustomer.
Nagpili-pili ang duha sa mga baligya ug sa pagduol sa cashier nga si Niño Damayo, 21-anyos, kalit lang kining giti-onan og armas dayong deklarar nga tulis.
Gikuha sa duha ka tulisan ang kuwarta sulod sa kaha nga mokabat sa P2,000 kapin ug gikuha usab ang duha ka mga cellphone nga gigamit sa pag-load ug nagdali kini sa pagpanggawas.
Si SPO4 Gabutero miingon nga ang cashier nga si Damayo mitug-an nga ang duha ka tulisan nagdali sa pagsakay sa gi-parking nga motorsiklo ug mipabulhot kini sa pagpadagan paingon sa dakbayan sa Sugbo. (BANAT NEWS)