Albularyo patay sa lalis sa manok, itlog
CEBU, Philippines - Gidunggab patay ang 78-anyos nga albularyo sa amahan sa iyang gitambalan sa barangay Anislag, Pinamungajan sa niaging gabii.
Ang biktima naila nga si Eugenio Lorion, taga Purok African Daisy samtang ang suspek mao si Pantaleon Baragados, 52, nagpuyo sa sitio Lumboy sa maong barangay.
Matud ni PO3 Marciano Suarez Jr., imbestigador sa Pinamungajan Police nga bugtong hinungdan sa krimen ang nahitabong lalis sa duha kabahin sa itlog ug manok.
Ang asawa sa suspek giingong dili kombinsido sa pagdili sa doktor nga pakan-on og itlog ang masakiton nga anak hinungdan nga nagpatabang kang Lorion.
Usa sa ritwal sa albularyo ang pag-ihaw og manok aron makatambal sa iyang pasyente.
Dihang naabot ang bana nga hubog, nasuko kini nga nag-ihaw og manok ang albularyo nga gidili man gani sa doktor ang pakan-on og itlog sa iyang anak.
Ang albularyo nangatarungan nga lahi ra ang itlog ug ang manok apan ang suspek kusganong nakiglalis nga ang itlog gikan sa manok.
“Mao ra gyud to ilang gilalisan kay ang itlog gikan man gyud daw sa manok mao nga dili gyud daw pwede mag-ihaw og manok,” matud ni Suarez.
Mikuha og plamingko ang suspek dayon hansak tumong sa dughan sa biktima sa makaduha ka higayun hinungdan sa kamatayon sa biktima.
Ang suspek ang nitahan usab sa iyang kaugalingon sa kapolisan ug gipasakaan og kasong murder. (BANAT NEWS)
- Latest
