Estatuwa ni Serging, V. Rama gibuksan

CEBU, Philippines – Giklaro ni Cebu City Mayor Michael Rama nga dili publicity lang ang gipahigayong pagbukas sa estatuwa nila ni Sergio Osmeña, Jr. ug Vicente Rama nga giatol sa iyang birthday kagahapon.

Si Vicente Rama nga apohan sa mayor usa ka kanhi senador ug nahimo usab nga mayor sa dakbayan sa Sugbo niadtong Nobiyembre 26, 1938 kinsa ang nipahural kaniya si kanhi Presidente Manuel L. Quezon sa Malacañang.

Si Sergio Osmeña, Jr., amahan ni kanhi mayor Tomas Osmeña, usa ka kanhi gobernador sa probinsiya sa Sugbo ug nahimong mayor sa dakbayan sa Sugbo niadtong tuig 1955, 1959 ug 1963 ug napiling kongresista sa kanhi ikaduhang distrito sa Sugbo niadtong tuig 1958.

Gipasabot ni Rama nga wala tuyoa nga naatol sa iyang birthday ang pag-unveil sa mga estatuwa sa duha ka nahisgutang inilang tawo sa Sugbo.

Matud sa mayor nga buot niya’ng i-unveil ang nahisgutang mga estatuwa kaniadto pa apan nakasinati kini og problema sa pundo.

Ang Insular Life Insurance Company mao’y midonar sa mga estatuwa diin matud ni Vicente Ayala, chairman of the Board ug chief executive officer sa maong insurance company, nga usa kini sa ilang pasalamat sa Sugbo sulod sa 76 ka tuig nga nagmalamboon ang ilang kompaniya sukad 1938.

Subay niini, pangindahay ni Rama sa iyang birthday mao ang kahiusahan sa tanan.

“I’ve been wishing about Philippines unity, solidarity and togetherness because if we put all these together, together we can make things happen,” matud ni Rama.  – /GMR) (BANAT NEWS)