Duha gidungan pagpatay

CEBU, Philippines – Duha ka tawo ang gidungan pagpatay ug may lain pa’ng usa nga naangol diha’ng sila gipangpusil didto sa Sitio Mahayahay, Barangay Calamba ning dakbayan sa Sugbo kagahapon sa buntag.

Ang mga namatay mao sila si Rolando Medalle, 27, ulitawo ug Francis Pangantoan, 22, ulitawo. Ang naangol naila usab nga si Viviencio Baldesamo Jr., 44, minyo, nga pulos nagpuyo sa mao’ng lugar.

Si PO1 Michael Angelo Singson sa homicide section sa Cebu City Police Office (CCPO) mitug-an nga samtang naglingkod-lingkod daplin sa sudlonon nga dalan ang mga biktima kalit lang miabot ang tulo ka lalaki ug ang duha mipusil kanila.

Human sa pagpamusil yano ra nga mibiya sa lugar ang tulo ka lalaki ug dayon sakay og motorsiklo. Ang mga biktima nga naigo sa lainlaing bahin sa ilang lawas gidala sa tambalanan apan namatay g’yud sila si Pangantoan ug Medalle samtang si Baldesamo padayon pa nga giatiman sa doctor.

Gituohan nga posible’ng naamong lang sa hitabo si Pangantoan ug target g’yud sa mga gunmen mao sila si Medalle ug Baldesamo. Gitan-aw sa kapolisan nga drugas ang posible nga hinungdan sa pagpamusil.

Usa ka sakop sa Philippine Drugs Enforcement Agency (PDEA7) ang miadto sa buhatan sa homicide section ug nangayo sa spot report sa mao’ng hitabo.

Sa pakighinabi sa Banat News ni Mark Maramba, ang operations chief sa PDEA-7, iyang gikonpirmar nga ila na diay nga gironda ang balay ni Baldesamo kaniadtong miaging bulan, apan kini nakasibat. Matud ni Maramba nga dili momenos sa duha ka bulto sa drugas ang ilang nasakmit gikan sa balay ni Baldesamo ug ila na ‘sab kini nga napasakaan og kaso sa hukmanan.

Wala na hinuon mohatag og dugang detalyi si Maramba kun unsa ang plano karon sa PDEA-7 nga karon anaa sa tambalanan si Baldesamo. Duha ka kabhang sa kalibre 45 nga slug ang nakit-an sa dapit nahitaboan.

Ang kapolisan miingon nga wala g’yud sila makakuha’g testigos sa pagpamusil kagahapon.

Samtang nadakpan sa kapolisan ang gikatahapang drug pusher didto sa Barangay Poblacion, Sogod kaniadto’ng Lunes sa gabii ug nakuhaan siya og 11 ka pakete’ng shabu.

Si Richard Orendo, 27, ulitawo nga taga Barangay Poblacion walay kasayuran nga gi-subject diay siya og buy-bust operation sa mga polis nga gipangulohan ni Inspector Romeo Capoy, hepe sa kapolisan sa Sogod. (BANAT NEWS)