Epekto sa transport strike gamay ra

CEBU, Philippines - Minus ra kaayo ang epekto sa gipahigayong picket rally sa mga drayber nga sakop sa Pinagkakaisang Samahan ng mga Tsuper at Operator (PISTON) kagahapon.

Usa ka Rustico Saludar, 25-anyos nga trabahante sa usa ka mall sa dakbayan sa Sugbo miingon nga dugay siya nakasakay gumikan sa pagnihit sa mga public utility jeepneys gikan sa dakbayan sa Mandaue. Apan si Felix Suico, City Disaster Risk Reduction and Management Officer sa Mandaue, miingon nga mga 10 porsiyento lang ang natibhang sa mga PUJ kagahapon.

Nagpadagan sila og upat ka L-300 ug tulo ka APV pick-up nga maoy naghakot sa wala kasakay nga mga pasahero nga nag-atang sa kadalanan.

Si Frank Brazil, pangulo sa City Traffic Management System (CTMS) sa dakbayan sa Lapu-Lapu mibanabana usab nga 30 porsiyento ang epekto sa biyahe sa mga PUJ. Kini ang hinungdan nga gipadagan usab sa kagamhanan sa maong dakyanan ang tulo nila ka mga Coaster nga mga sakyanan aron mohakot sa mga pasahero.

Si Joy Tumulak, operations officer sa Cebu City Traffic Operations Management (CITOM), miingon nga wala makahatag og epekto sa gidaghanon sa nagbiyahe nga mga PUJ sa dakbayan sa Sugbo kay nakasinati pa man ang pipila ka mga dalan og paghuot sa mga sakyanan. Matud ni Tumulak nga bisan wala makahatag og dakung epekto ang picket rally sa mga drayber apan nagpadagan gihapon sila og mga sakyanan sa kagamhanan. (BANAT NEWS)